Gascon Lanas qu'es ua federacion de 18 associacions occitanistas de totas las Lanas, acasada a Monthòrt.
L'adreça postau que n'es :
Gascon Lanas, 211 chemin de Brameloup, 40 380 Monthòrt.
Qu'es tanben la seccion landesa de l'I.E.O (Institut d'estudis Occitans).
Gascon Lanas que Significa :
Gropament associatiu entà la sauvaguarda de la culture d'òc dens las nostas Lanas.
Gascon Lanas qu'es ua associacion declarada devath lo regime de la lei
de 1901.
Coprésidents :
Secretària : Patrice Walbott.
Dinerèra : Clara Bernet .
Preambule deus estatuts de l'associacion
Lo patrimòni culturau deu departament de las Lanas estant constituit tanben per la lenga gascona,
dialècte occidentau de l'ensemble deus país de lenga d'òc (ou occitan), las associacions
aderentas que tienen a çò qu'aqueth eretatge preciós ne sii pas complètament deperdut per
ignorància e inconsciéncia. Qu'an per amira de tot hicar en òbra e de coordonar los sons esfòrç entà
sauvaguardar autant com har víver lo gascon, dab un triple prètzhèit :
- perméter la transmission d'aqueth eretatge lingüistic e culturau, partida integranta deu
patrimòni landés, a las generacions joenas. Aquò sembla especiaument necessari en ua societat de
mei en mei miaçada per la mondializacion economica e la banalizacion culturau.
- valorizar las composantas ricas d'aquera cultura, qui permeti ua mei grana obertura sus
nombre de país e regions d'Euròpa, en particular au sud (País Catalans, Aragon e autas comunautats
autonòmas d'Espanha, Vath d'Aran, Vaths Occitanas d'Italia) e qui son a còps mei coneishudas e
apreciadas dens los país estrangèrs on la tradicion deus estudis occitans qu'es establida
despuish bèra pausa (Alemanha, Austria, Catalonha, Estats Units, Japon en particular). Tot aquò pòt
en tornar atraçar de cap a las Lanas un potenciau de visitaires de totas las regions de França,
mes tanben deu sud com deu nòrd d'Euròpa qui trobaràn atau un "mei" culturau au cors de las
soas demoradas toristicas dens lo noste departament. Puishque d'autas regions de França e
son dejà avançadas en operacions de valorizacion patrimoniau d'aqueth escantilh, que sembla normau
de non pas deishar las Lanas a l'endarrèr en aqueth maine.
- non pas deishar marginalizar las Lanas en mestior d'identitat culturau, mentre que d'auts
departaments e's son engatjats dab aviada en aquera via dens las annadas 1990. La lenga
regionau, a la quau e son estacats tant per la practica que peu sentiment, hòrt de landesas e de
landés, que constitueish de fèit un element hòrt d'enradigament. A l'òra quan evòcan sovent
l'abséncia de valors e la desapareishuda deus punts de repèris entà la generacions navèras,
l'ancoratge en repèris segurs e solides de la cultura gascona ne pòden pas estar sonque
positius.
-
Las associacions membres que desiran donc utilizar tots mejans a la soa disposicion entà obtiéner lo
desenvolopament de l'ensenhament deu gascon e de la cultura gascona a tots nivèus, tant dens
l'encastre de l'ensenhament public qu'associatiu. Que desiran ua visibilitat deu gascon qui passi
peu son emplec dens la vita sociau e economica. Que demandan la mesa en plaça d'ua politica
departamentau volontarista de sostien e de desenvolopament de la lenga e de la cultura
gasconas, tau com e's hè dempuish longtemps en d'auts departaments d'Aquitània (Pirenèus
Atlantics, Dordonha) o d'autas collectivitats territoriaus (Pirenèus Hauts, Lengadòc-Rosselhon)
e los mejans financièrs necessaris (umans e materiaus).
Elements essenciaus de la constitucion de la nosta identitat, la lenga e la cultura gasconas que son,
de mei, factors privilegiats de desenvolopament intellectuau, sociau e economic.
